Ga Hkyeng Bum Ginwang, Chyawk Gyi mare kata kaw na Myen hpyen gumshem Balik Dap hpe August (31) ya shana KIA pawnghpawm hpyenhpung ni sa htim gasat ai lam nga ai re.
Dai Myen Balik dap hta Myen hpyen gumshem dap Hk.L.y (77) kata na hpyen hpung ni mung wa shingbyi nga ai majaw, KIA Masat (5) Dap Dung kata na KIA hpyenhpung ni hte KPDF pawnghpawm hpyenhpung ni htim gasat ai rai nna, hpyen bawng nkau hte hpyen lang rai nkau hpe mung zing lu ai lam na chye lu ai.
Ginjaw Ginra makawp maga ginra, shawnglam hpyenman shara Myitkyina Manmaw mawdaw lam mayan hta mung Myen hpyen gumshem dap ni kawn hpyen shamu shamawt ai lam ni nga ai majaw KIA hpyenhpung ni hte gasat poi matut byin nga ai lam nga ai re.
Myen Hpyen Gumshem dap ni September (1) ya shani hkying 11:00Am daram hta Awng Ja, Ma Lang Kawng maga de gasat gala majan byin ai lam n nga ai raitim sinat laknak kaba gap bang ai lam nga ai.
September (1) ya shani hta mung Hkang Kai Dap kaw nna Myen hpyen gumshem hpyen manam ngu maram lu ai hpyenhpung ni gaw Munglai hka nam maga hku shamu shamawt hkawm ai lam nga ai arai nna, Ting Hpara mare kaw bai wa shang hkring nga ai lam mung sagawn chye lu ai.